Cynllun Plant a Phobl Ifanc DRAFFT 2011-2014
Cynllun strategol tair blynedd yw’r Cynllun Plant a Phobl Ifanc, a’i nod yw ymdrin â meysydd blaenoriaeth a diwallu anghenion holl blant a phobl ifanc Sir y Fflint.
Mae’r Cynllun yn ystyried pob agwedd ar fywydau plant, o’r cyfnod cyn eu geni nes y byddant yn 25 oed. Mae hefyd yn cynnwys materion rhianta a materion yn ymwneud â theuluoedd. Mae angen i asiantaethau a gwasanaethau gydweithio i ddelio â’r materion hyn - ni all yr un asiantaeth neu wasanaeth ddelio â meysydd blaenoriaeth ar eu pennau eu hunain.
Y Bartneriaeth Plant a Phobl Ifanc sy’n arwain y gwaith o roi’r Cynllun ar waith.
Wrth i gynllun 2008-11 ddirwyn i ben, mae cynllun newydd yn cael ei ddatblygu ar gyfer 2011-14. Mae’r Cynllun drafft wedi’i ddatblygu gyda chyfraniadau gan blant, pobl ifanc a theuluoedd a llawer o’r gwasanaeth a’r sefydliadau sy’n gweithio ar eu rhan.
O ganlyniad i’r gwaith hwn, nodwyd cyfres newydd o ganlyniadau arfaethedig, a hoffem wybod beth rydych chi’n ei feddwl ohonynt a sut y gallwn weithio gyda’n gilydd i’w gwireddu.
Caiff yr holl wybodaeth a gesglir ei hystyried wrth ddatblygu’r Cynllun Plant a Phobl Ifanc newydd 2011-14.
Crynodeb o’r canlyniadau arfaethedig i’r Cynllun Plant a Phobl Ifanc 2011-14
Trwy weithio tuag at bob un o’r pethau hyn, gobeithiwn y bydd plant, pobl ifanc a theuluoedd yn Sir y Fflint mor hapus ag y gallant fod.
Mae plant a phobl ifanc yn cael gofal.
Bydd pob plentyn yn Sir y Fflint yn cael y dechrau gorau mewn bywyd. Trwy ddal problemau’n gynnar, gallwn eu hatal rhag troi’n broblemau mwy yn y dyfodol.
Mae plant a phobl ifanc yn barod, yn gallu ac yn cael eu hannog i ddysgu.
Bydd pob plentyn ac unigolyn ifanc yn Sir y Fflint yn cael llawer o wahanol gyfleoedd i ddysgu, boed hynny yn yr ysgol neu’r coleg neu’r tu allan, fel bo modd iddynt ddatblygu sgiliau i’w defnyddio trwy gydol eu bywydau.
Mae plant a phobl ifanc yn byw bywydau iachach ac maent yn hapus!
Dylid diogelu iechyd plant a phobl ifanc. Caiff bywydau iach eu hybu a bydd gwasaanethau ar gael i helpu’r rheiny sy’n sâl, sydd ag anabledd neu unrhyw anawsterau eraill.
Mae plant a phobl ifanc yn cael amser a lle i chwarae a chymryd rhan mewn gweithgareddau.
Mae gan blant a phobl ifanc hawl i chwarae a chymryd rhan mewn llawer o weithgareddau hwyliog a chwaraeon eraill.
Mae plant a phobl ifanc yn cael eu parchu ym mhob rhan o’u bywydau.
Mae gan blant a phobl ifanc hawl i gael eu clywed pan fo penderfyniadau sy’n effeithio arnynt yn cael eu gwneud.
Mae plant a phobl ifanc yn ddiogel ac yn cael eu hamddiffyn.
Caiff plant a phobl ifanc eu hamddiffyn rhag pethau a allai eu hatal rhag tyfu a datblygu. Bydd cymorth ar gael i deuluoedd i’w helpu i ymdopi ag unrhyw anawsterau y maent yn eu hwynebu.
Mae gan blant, pobl ifanc a theuluoedd adnoddau sydd eu hangen arnynt i gynyddu eu cyfleoedd.
Bydd teuluoedd, plant a phobl ifanc yn Sir y Fflint yn gallu cael y gorau allan o fywyd a chyrraedd eu potensial, hyd yn oed pan nad oes ganddynt bob amser ddigon o arian.
I gael rhagor o wybodaeth neu i holi ymhellach, cysylltwch ag Emma Jones, Swyddog Gwybodaeth a Chyfranogiad, y Bartneriaeth Plant a Phobl Ifanc ar 01352 704147.
Cynllun Plant a Phobl Ifanc DRAFFT 2011-2014
